WIMBO WA BAHATI BUKUKU DUNIA HAINA HURUMA NUSURA UPELEKE DALADALA KITUO CHA POLISI MSIMBAZI

Katika HALI ya kustaajabisha abiria mmoja aliyekuwa akielekea Muhimbili akitokea stendi ya Bugurunu, almanusura asababishe dereva wa daladala kupeleka gari katika kituo cha polisi Msimbazi baada ya kumg’ang’ania dereva wa basi hilo aliyezima ghafla wimbo huo wa bahati bukuku unaoitwa Dunia haina huruma.

Kituko hiki kilianzia maeneo ya kona ya mtaa wa Muheza mkabala na duka la kanda za muziki wa injili la Mbogo shop maeneo ya Shule ya sekondari ya benjamini Mkapa. Dereva alipoanza tu kuchepuka akiingia mtaa wa muheza ili kukwepa foleni ya pale  ‘round about’ alizima redio iliyokuwa ikipiga wimbo huo wa Bahati Bukuku, Dunia haina huruma ndipo abiria huyo mwanamke wa makamo akaanza kulalamika ni kwa nini dereva amezima redio. Abiria tulidhani labda atanyamaza lakini muda ulivyozidi kwenda naye alizidi kupiga kelele huku akidai wimbo huo unamkumbusha mambo mengi sana likiwemo suala la kufiwa na mume wake.

Mama huyu alitishia kwenda alipo dereva akafungue redio mwenyewe ndipo kondakta alipoamua kumzuia. Mpaka tunafika maeneo ya kituo cha Msimbazi Polisi ,mama huyo alikuwa bado akilalamika, huku watu wakishangaa na kusema labda alikuwa na matatizo ya akili na alikuwa akipelekwa muhimbili kwa matibabu. Wengine walidiriki hata kusema huyo aliyekuwa na huyu mama ajitokeze kumtuliza lakini ilionekana alikuwa peke yake.

Mwishowe dereva aliamua kufungulia tena redio yake akipiga wimbo ule ule wa Bahati Bukuku, Dunia haina Huruma. Nilishuka kituo cha Msimbazi na sijui ni kitu gani kilichoenda kujiri huko mbele ya safari,ikiwa yule mama aliendelea kupiga kelele au aliridhika na kunyamaza baada ya kuwekewa ule wimbo.

Tweet