NI MAAJABU:MCHAWI ALIYEUWAWA BAADA YA KUDONDOKA NA UNGO HUKO MBEZI

Anayedaiwa kuwa mchawi aliyedondoka na ungo akisulubiwa kabla ya kuuwawa.

Matukio ya watu kudondoka na ungo siyo mageni hata kidogo miongoni mwa jamii za Kitanzania na hata za Kiafrika kwa ujumla. Ni mara nyingi tu hasa kwenye vyombo vya habari utasikia mtu/watu katika eneo fulani wamedondoka kwa ungo na katika kila tukio hadithi ya mchawi/wachawi hao kuwa walikuwa wengi, lakini wenzake wakakimbia na kumuacha huwa haikosekani, hamna hata siku moja imewahi kusikika kwamba watu wawili ama wote waliokuwa katika safari moja wameanguka.

Matukio haya hugubikwa na imani potofu za kishirikina huku wananchi wanaowakamata wachawi hao wakidai kuwa wamechoshwa na vitendo vya kishirikina na hujidai kuwa na hasira kali, huongozwa na “Mob Psychology”, kitendo kinachosababisha mtuhumiwa kuuwawa pasipo hata kuchunguza ushahidi ikiwa ni kweli alidondoka kwa ungo ama la. Matukio hayo yapo mengi sana na kila mwaka utasikia jijini Dar na hata huko mikoani watu wakiwa wamenaswa baada ya kudondoka na ungo, lakini tukio lililonifanya niandike makala hii ni hili lililotokea hivi karibuni huko mbezi, “Picha za namna mchawi alivyoanguka jijini Dsm na kuuwawa na Wananchi”, unaweza kulitazamahapa kabla hujaendelea na makala hii zaidi.

Ukweli kwamba watu hao hudondoka kwa ungo hakuna mtu anayeweza kuthibitisha pasipokuwa na shaka yeyote, hata kama ikiwa mtuhumiwa mwenyewe anakiri hadharani kwamba alidondoka kweli. Inawezekana kabisa mtuhumiwa akakiri hivyo kutokana na sababu mbalimbali zikiwemo kuogopa hasira na kipigo kutoka kwa wananchi hao, kutokana na sababu zake binafsi kwa mfano ni kutokana na lengo la yeye kujifanya amedondoka kwa ungo sababu ambazo mara nyingi huwa ni  za kujinufaisha kibiashara aidha kwake binafsi au kwa mtu mwingine na mara nyingi huwa ni waganga wa kienyeji  ambao humtumia mhusika na kisha kujifanya yeye ndiye aliyemdondosha halafu baadaye wananchi walioshuhudia hujenga imani kwake na kuwa wateja wazuri.

Sababu nyingine hutokana na baadhi ya madhehebu ya dini ambayo hutengeneza tukio la kuigiza kwa mtu kuambiwa ajifanye kadondoka kwa ungo na kisha huandaliwa mazingira ambayo wahusika wa lile dhehebu huhusishwa kwa namna moja au nyingine. Wakati mwingine hata mtuhumiwa huelekezwa kupanda juu ya paa la nyumba ya ibada na kisha kujidondosha katikati ya waumini wakiomba, waumini hao utakuta hawana taarifa yeyote juu ya ‘mchongo’ huo isipokuwa wale viongozi wanaohusika tu. Waumini kwa kuwa hawakuwa na habari basi hueneza taarifa hizo haraka na mara moja dhehebu hupata waumini wengi baada ya kuambiwa kuwa ni nguvu za Mungu ziliweza kumdondosha mchawi na isingewezekana kabisha akatize katika anga lile kirahisi.

Sabau nyinginezo hutokana na Magonjwa ya akili, matukio mengi yanayosemekana ni watu kuanguka kwa ungo, ukiyachunguza kwa makini utabaini ya kwamba watuhumiwa ni wagonjwa wa akili, na wengi ni vikongwe ambao magonjwa ya namna hiyo hasa ugojwa wa kusahau ni kitu cha kawaida. Anapoulizwa katoka wapi hushindwa kujibu kutokana na ugojwa wa kusahau, na hata anakokwenda pia huwa masikini haelewi, kwa hiyo wananchi kitendo hiki hukitafsiri kama kwamba mtuhumiwa ni mchawi na kuzidi kumuadhibu pasipo kujua kwamba hata na wao ipo siku watazeeka na pengine kukutwa na hali kama hiyo. Wenzetu nchi kama Uingereza hili wanalitambua na wazee waliokuwa na matatizo kama hayo huwekwa sehemu moja na kutunzwa vizuri.

Cha kushangaza sana ni kwamba katika matukio yote hayo, stori huwa ni ile ile haibadiliki sana, utaambiwa kwamba wananchi kabla hata ya kumuua mtuhumiwa kwanza zana zake zote za kichawi ikiwa ni pamoja na ungo wenyewe walivitia moto. Pia utaambiwa kuwa mchawi huyo alikuwa akienda kwenye mkutano na wachawi wenzake na kama siyo visiwa vya shelisheli, Comoro sumbawanga, au Brazili basi watakuambia ni msumbiji. Hapa inatia shaka sana, ni kwa nini vifaa hivyo visitunzwe vikaja kuonyeshwa kwa waandishi wa habari na picha zikapigwa?

Umati wa raia ukiwa umemzingira aliyedaiwa kudondoka na ungo

Ukikuta matukio ya kutengenezwa mfano na waganga wa kienyeji kwa lengo la kujipatia wateja mara nyingi mhusika humuwekea na vifaa zikiwemo tunguri za vibuyu na ungo wa ukweli lakini shaka huja pale ambapo haijawahi hata siku moja ‘mchawi’ akanaswa akiwa angani na mtu angalao akafanikiwa kupiga picha ikaonekana.

Na waandishi wa habari nao kwa kutaka kuuza huweka chumvi yingi katika habari hizo na kuandika kwa mtindo ambao huwafanya watu kuamini kuwa ni kweli watu hao walidondoka kwa ungo, hebu tazama habari hii hapa iliyoandikwa na uwazi mwaka 2010 ya mtu mwingine tena aliyedaiwa kudondoka na ungo na kuuwawa, “Aliyedondokana ungo na kuuwawa: kumbe siyo mchawi” utafahamu ukweli juu ya matukio haya na jinsi ambavyo watu huyachukulia ndivyo sivyo. Habari iliyotanguliwa na hiyo ambayo ndiyo iliyoanza kutolewa ni hii hapa iliyosema “Aliyedondoka na Ungo Dar” 

Shukurani kwa mitandao ya Global publishers na Sangafesto blog.

Tweet