HAYA WAJASIRIAMALI CHANGAMKIENI FURSA TOVUTI YENU HII HAPA

Kiongozi wa Timu, Dk Ellen Otaru Okoedion 

akiongea wakati wa uzinduzi wa tovuti hiyo

Dar es Salaam. 
Wajasiriamali wazawa sasa wanaweza kurasimisha biashara zao kwa urahisi, ziwe ndogo au kubwa, baada ya kuanzishwa kwa tovuti iliyosheheni taratibu za kufuata pamoja na hati muhimu za kisheria zilizotafsiriwa kwa lugha ya Kiswahili ambazo ujazwa kabla ya kurasimisha biashara.

Tovuti hiyo - www.fanyabiasharatanzania.com – ni zao la Timu ya Tanzania ya mwaka 2013 katika Programu ya Maendeleo ya Sekta Binafsi iliyopewa mafunzo na Serikali ya Sweden kupitia shirika lake la Sida, ikishirikiana na SIPU International na Jarskog Konsult kwenye masuala ya Mkakati wa Usimamizi wa Biashara na ukuaji wa sekta binafsi.

Akizungumza wakati wa mahafali na uzinduzi wa tovuti hiyo, Kiongozi wa Timu, Dk Ellen Otaru Okoedion alisema tovuti hiyo imetengenezwa na timu ya wajasiriamali wa Kitanzania na wawakilishi kutoka sekta ya umma chini ya mpango wa PSD, unaolenga kuwasaidia wajasiriamali wazawa na watu wengine wanaojihusisha na biashara kupata taarifa mbali mbali muhimu zakuendeleza biashara zao.

“Hii tovuti itawaokolea muda wao, fedha na nguvu zao katika kutafuta taarifa ambazo mara nyingi utawanyika, na kutopatikana kwa urahisi na mara nyingi mjasiriamali ulazimika kutumia gharama kubwa kukusanya taarifa hizi,” alisema.

Uanzishwaji wa tovuti hiyo ni hatua ya kuhamasisha ukuaji wa biashara ndogo, wakati huohuo kuunga mkono jitihada za Serikali katika kurasimisha biashara hizo, ambazo uhamasisha si tu biashara kuwa na ushindani ndani ya nchi, kanda na kimataifa, lakini pia kuongeza mapato ya serikali kupitia kodi.

Tovuti hiyo ina taarifa zote muhimu zinazohitajika kuanza, kusajili na kupanua biashara nchini Tanzania. Pia imeunganishwa moja kwa moja na mfumo wa wizara zote muhimu, mashirika na sekta binafsi. Pia imetoa maelekezo ya jinsi ya kujaza fomu za usajili wa biashara zinatolewa na Wakala wa Usajili wa Biashara na Utoaji Leseni (BRELA).

Chanzo Mwananchi.

Tweet