BWAWA LA MAJI KEEPLEFT SHULE YA UHURU: ABIRIA WATOA SULUHISHO.

Kama wewe ni abiria mkaazi wa maeneo ya Buguruni, TABATA Gongo la mboto, Kiwalani ama hata eneo lolote lile ambalo ni lazima utumie barabara ya Uhuru, ni lazima umekwisha ionja  adha hii ya dimbwi kubwa la maji machafu mithili ya bwawa la samaki lililozuka kwenye barabara maeneo ya Shule ya Uhuru katikati ya Sekondari ya Benjamin Wiliam Mkapa na makutano ya Shule ya Uhuru.

Nikiwa kwenye basi aina ya costa lililokuwa likielekea Mnazi Mmmoja likitokea maeneo ya Tabata, basi lilipofika tu katika eneo hilo katikati ya bwawa, ghafla injini ya gari ilizimika ndiposa kasheshe ilipoanza. Kila abiria kuanzaia dereva wa basi, kondakta mpaka wanafunzi wa shule, kila mmoja alisema lake ilimradi tu wakionyesha hasira zao kwa utawala hasa viongozi wa serikali waliochaguliwa na wananchi.

“Nawashangaa sana hawa viongozi, kuanzia ngazi ya mtaa, kata mpaka huko juu, wakija kuomba kura, utawasikia wakitoa ahadi kibao kwa unyenyekevu mkubwa, lakini ona sasa, dimbwi hili kila masika lipo na hamna anayeshughulika nalo” Alisema mama mmoja kwa uchungu.

“Magari ya kunyonya majitaka ya Halmashauri ya jiji yako wapi?, ni mafuta kiasi gani yanahitajika, si waseme wananchi tujitolee wenyewe kuchanga hela ya mafuta waje wayanyonye kuliko kutaabika namna hii…” Naye baba mmoja wa makamo hivi alitamka.

Kijana mnwingine naye alihamaki, “Si ingelikodishwa hata pampu ya dizeli maji yakaelekezwa kwenye chemba ambazo hazijaziba, mbona ni kazi  ya dakika chache tu……! Hawa serikali kwa kweli hawatujali kabisa sisi wananchi tuliowaweka pale”.

Alidakia dada mwingine na kusema; “Ni kwa sababu viongozi wenyewe hawapiti hapa, wangeshaamuru patengenezwe siku nyingi, mbona ujio wa Obama barabara yote ilifagiliwa kwa wiki moja iweje washindwe haka kadimbwi? Wenzetu hupita Nyerere road kwa raha zao na mavingora”

“Ni aibu kubwa, kwanza wangebadilisha hata na jina lenyewe, Uhuru road likawa Madimbwi road” Kijana mmoja mwanafunzi wa sekondari naye alidakia.

Bwawa la maji machafu ya mvua katikati ya barabara Shule ya Uhuru jijini Dar es salaam.

Kwa kweli ilikuwa ni shughuli pevu, abiria kushuka tutembee kwa miguu haikuwezekana, na wala kusukuma gari napo haikuwezekana pia. Kila mtu aliganda garini akimsubiri kondakta na dereva wake wangeamua nini. Kondakta alijaribu kushuka kwenda kusukuma peke yake lakini pasipo mafanikio yeyote.

Kwa bahati njema, dereva na kondakta wake waliomba msaada kutoka basi jingine wakafunga mnyororo uliosaidia kuikokota costa mpaka “ufukweni” mwa lile bwawa ndipo sasa na sisi tukashuka kutoka garini. Lakini iliwabidi kondakta na dereva wake walowe maji chapachapa kuanzia unyayoni mpaka maeneo mengine ya mwili katika pilika pilika zile za kuufunga mnyororo.

Kwa kweli hasara ya kiuchumi na muda inayowapata wananchi wanaotumia barabara hii haimithiliki achilia mbali ile hasara wanayokula wenye magari yanayozimika pindi tu yanapojaribu kuyavuka maji hayo.

Sidhani kama gharama za kuyaondoa maji yale zinaweza zikazidi hasara inayopatikana kila siku. Foleni ya daladala unapotokea Mnazimmoja au Posta ndiyo hata usiseme!  Inaanzia pale Bakhresa jirani na KCB Bank, ukijakufika Karume,  unakuwa hoi bin taaban!  Na tayari wakati huo unakuwa umekwishatumia zaidi ya saa moja ukiwa ndani ya gari. Kwa mjasiriamali mogomdogo hiyo ni hasara kubwa !

Picha ni kwa hisani ya Mjengwa Blog

Tweet